天團MIRROR喺機場博覽館嘅16場演唱會步入尾聲，向來MIRROR演出嘅門票都喺「黃牛市場」有價有市，呢期唔少fans share演出片段之後，令更多人想搵飛睇現場。加上演出最後部份係由各位成員負責嘅「彩蛋」，而團內「上弦一二」姜濤同Anson Lo嘅個人彩蛋表演仲未出現，唔少姜糖同神徒都想目睹偶像個人風采，炒風自然更加熾熱。


我地獲得一份「黃牛黨」嘅MIRROR演唱會價目表，從中可見今晚（星期一）原價$1480門票已經最少炒到去$2500 ，最貴嘅更加炒到$9800。今個星期二星期三嘅兩場演出炒風稍為降溫， $1480門票就炒到上去大約$3000至$5000不等。至於個唱最後兩場，亦即係今個星期五星期六嘅演出門票，原價$680嘅飛最新叫價係$3000 ，而$1480嘅飛最新炒價至少要$5200。最誇張嘅係2月3號終極尾場，坐喺第12行嘅門票每張要$12,500！